गएको बैशाख २६ गते
डोजरले घरटहरा भत्काएपछि राजधानी थापाथलीको बाग्मती नदी किनारमा बस्दै
आएकामध्ये ५८ घरपरिवार अझै त्यहीं अलपत्र अवस्थामा छन् । डोजर चलाउनुअघि
त्यहाँ २ सय ५२ घरटहरा थिए । डोजरले वस्ती भत्काएपछि सबैको भागाभाग भयो ।
अलिअलि कमाई भएका र भाडा तिरेर बस्न सक्नेहरु झिटीगुन्टा बोकेर हिंडे ।
साँच्चिकै सुकुम्बासीको चाहिं बिजोग भयो ।
पहिले २ सय ५२ घर परिवारमध्ये अहिले ५८
घरपरिवार मात्र थापाथलीको बागमती किनारमा छन् । बस्ने घर उजाड भएपछि उनीहरु
पाल टाँगेर बसेका छन् । वषर्ाको बेला नदी किनारको चौर हिलो र पानीले ओभानो
छैन । नदीमा कुनबेला बाढी आउँछ भर छैन । एकसरो पालले राम्ररी ओत ढाक्न
सकेको छैन । यस्तै बिजोक सहँदै उनीहरु जसोतसो गुजारा गर्दै आएका छन् ।
यसबीचमा सरकारले अस्थायी रुपमा चोभारमा
सार्ने योजना पनि बनायो । तर त्यहाँका बासिन्दाले बिरोध गरे । अहिले
सरकारले इचंगुनारायणमा स्थायी घर बनाउने तयारी गरेको छ । त्यहाँ घर
नबन्दासम्म हटाइएका सुकुम्बासीलाई ललितपुरको सुन्दरीघाटमा राख्ने गरी अहिले
काम भैरहेको छ ।
सरकारले बुधबारदेखि रानीघाटमा अस्थायी
टहरा बनाउन शुरु गरेको छ । तर त्यहाँ पनि स्थानीयबासिन्दाले बिरोध गरेका
छन् । यसअघि आफूहरुको जग्गा अधिग्रहण गरेको सरकारले आफूहरुलाई सुकुम्बासी
बनाएर अरु सुकुम्बासीलाई ल्याएर राख्न खोजेको भन्दै उनीहरु आक्रोशित भएका
हुन् । स्थानीयबासिन्दाले बुधबार त्यस क्षेत्रमा बिरोध प्रदर्शन पनि गरे ।
तर प्रहरीले बल प्रयोग गरेर त्यहाँ टहरा बनाउने काम शुरु भएको छ ।
एकहप्तापछि टहरा बनिसक्ने र त्यसपछि सुकुम्बासीलाई राख्ने शहरी विकास तथा
भवन निर्माण विभागले जनाएको छ । त्यहाँ अस्थायी रुपमा मात्रै राख्ने भएकाले
बिरोध नगर्न सरकारले स्थानीयबासिन्दासित आग्रह गरेको छ ।
जस लिने होड
शहरी विकास तथा भवन निर्माण विभाग र
बागमती सभ्यता एकीकृत आयोजनाको सकृयतामा बैशाख अन्तिम हप्ता थापाथली
किनारबाट सुकुम्बासीलाई हटाउने काम भयो । त्यही बेला काठमाडौं विकास
प्राधिकरणको आयुक्त केशव स्थापितले यसको बिरोध गरे । सुकुम्बासीलाई
वैकल्पिक व्यवस्था नगरीकन हटाउन नहुने उनको भनाई थियो । अब हटाईसकेपछि
उनीहरुलाई चोभार राख्ने भनेर उनले नै भने । विभाग र आयोजनाले निश्चित रकम
दिएर सुकुम्बासीलाई पठाउने योजना बनाएको थियो । तर स्थापितले अस्थायी रुपमा
राख्ने भनेर सार्वजनिक गरेपछि सुकुम्बासी बिरोधी हुन नहुने भएकाले विभाग र
आयोजनाले पनि समर्थन जनाए । तर स्थानीयबासिन्दाको बिरोधका कारण चोभारमा
सार्ने काम हुन सकेन ।
स्थापितको योजना अनुसार काम हुन नसकेपछि
अहिले विभाग र आयोजनाले रानीघाटमा सार्ने काम गर्दैछन् । तर त्यहाँ पनि
योजना अनुसार काम हुने नहुने ठेगान छैन । केही गैरसरकारी संघसंस्था पनि
सुकुम्बासीको लागि काम गर्ने योजना बनाउँदैछन् । तर ती निकायबीच आपसी
समन्वय चाहिं हुन सकेको छैन । जस लिने होडले वास्तविक सुकुम्बासी चाहिं
अलपत्र परेका छन् ।
0 comments:
Post a Comment